Firaq Gorakhpuri says

mujhako maaraa hai har ek dard-o-davaa se pahale 
dii sazaa ishq ne har jurm-o-Khataa se pahale 

aatish-e-ishq bhadakati hai havaa se pahale 
honth jalate hain muhabbat mein dua se pahale 

ab kamii kyaa hai tere be-sar-o-saamaanon ko 
kuchh na tha teri qasam, tark-o-fanaa se pahale 

ishq-e-bebaak ko daave thay bahut Khalavat mein 
kho diyaa saaraa bharam sharm-o-hayaa se pahale 

maut ke naam se Darate the ham, ai shauq-e-hayaat 
tuune to maar hii Daalaa thaa qazaa se pahale 

ham unhen paake "Firaq" aur bhii kuchh khoye gaye 
ye takalluf to na the ahad-e-vafaa se pahale